Agjencia e Ushqimit dhe Veterinarisë (AUV) ka njoftuar se situata lidhur me produktin ushqimor APTAMIL AR 2 – 400 gram është nën kontroll të plotë dhe se institucionet përkatëse janë duke vepruar me përgjegjësi maksimale, në përputhje me njoftimin e pranuar nga Sistemi i Alarmimit të Shpejtë për Ushqim dhe Ushqim për Kafshë (RASFF).

Sipas AUV-së, nga momenti i pranimit të informacionit nga RASFF e deri më sot, nga tregu janë tërhequr gjithsej 212 pako të këtij produkti, me datë skadimi 02.01.2027, të cilat do të asgjësohen në përputhje me legjislacionin në fuqi.

“Agjencia e Ushqimit dhe Veterinarisë do të vazhdojë më tej me gjurmueshmërinë e shpërndarjes së produktit APTAMIL AR 2 – 400 gram dhe me tërheqjen e tij nga tregu. Edhe pse përballet me mungesë të theksuar të inspektorëve, AUV dëshmon se mekanizmat e sigurisë ushqimore janë funksionalë dhe se shëndeti i konsumatorëve mbetet prioritet absolut i Agjencisë. AUV mbetet e përkushtuar në monitorimin e vazhdueshëm të zinxhirit ushqimor, me qëllim ruajtjen e besimit të qytetarëve, garantimin e sigurisë ushqimore dhe mbrojtjen e shëndetit publik në Kosovë”, thuhet në njoftim./Arbresh.info